Gabaygan waxa tiriyey Allah ha u naxariistee Camanje Yogol oo reer Qabribayax ahaa taariikhdu markii ayayd 1941dii markaasoo Ugaas Dooddi iyo halgamaa kale oo la odhan jiray Faarax Oomaar oo reer Burco ahaa ingiriisku ku wada xidhay xabsi ku yaalla jasiiradda siishelis, halkaasoo ay muddo 7sano ah ku xidhnaayeen. Sannadahaasi waxay ahaayeen sannadihii ugu xumaa ee soo mara Gadabuursiga kuwaasoo taariikh raad xun oo illaa maanta muuqata kaga tegay.

  1. Deheeye iyo ina Qoofaloow, duul idiin taliye

  2. Dariiqaad kasoo qaadateen, daar ibliis galaye

  3. Doofaar ma galo kayn haduu, sheekh ka daalaco eh

  4. Danbas buu harraatiyey ninkii, doqon wax taartaaye

  5. Gadabuursi boqor doobirlaa daadahayn jiraye

  6. Dixda Faafan teer iyo badduu, daadsanaan jiraye

  7. Dawlad bay ahaayeen jirtoo laga danbeeyaaye

  8. Markuu dad iyo duunyaba dhergee dalagna loo raacshay

  9. Dawan baa iblaysku uga lulay meel dushooda ahe

  10. Waa loo dabbaal degay intay daris u waabeene

  11. Duco aan Ilaahay aqbalin daaro loo gogolye

  12. Dal-macaali bay moodayeen oo u soo degaye

  13. Markaasaa dulli iyo caydh la yidhi ha idin deeqeene

  14. Waanatii abaar loogu daray diirato ahayde

  15. Dalkoodiina waa laga qabsaday daahirka ahaaye

  16. Daaduunka waakaa ku tegay duul an la aqoone

  17. Dixda harawo dibi sooma ciyo awr ma doob-dhabo eh

  18. Hablo darayamuuslihi ciyaar uma dareeraane

  19. Boorame nin duublihi ma galo oo dan baa tidhiye,

  20. Idiinbacasba dunidoo dhanbay deeqday caanaha eh

  21. Waxse loogu dawgalay markuu reer samuud dilaye.

  22. Duufaanta reer caad markii duhurka loo keenay

  23. Dabayl Eebbeheen wado markii lagu dullaynaayay

  24. Daruur hoori bay moodayeen oo ku doog-dhabane

  25. Dubaaqaba ma gelin maanta waad dabar go'aysaane

  26. Isagoo dikriyayoo ku qaba madaxa duub weynna

  27. Waswaas oo duqii dhalay wataa soo duljoogsadaye.

  28. Dildillaaca waaberi markuu daakirku iftiimo

  29. Shaydaan biyaha soo darsaday oo ku darab yeeshay

  30. Adigoo salaad doonaya haduu dacalka kaa raaco

  31. Ashahaadaduu kaa duwaa oo daacad ma ahayne

  32. Ogoobeey dadkeenana ku badan duul sidaas ahiye.

  33. Kuwii nebiga diidee fircoon doortay baa tahaye

  34. Dayax shaniyo tobanuu ahaa dunida nuuraaye

  35. Rabboow Dooddi noo soo fur dhaha dib ad u fiishaane.