Dagaalkii Naaleeye Axmed iyo Habaryoonis 1992


Gabaygan waxa tiriyay abwaan Cabdirashid Dhal Darwiish. Wuxuuna ka mariyey dagaaladii ka dhacay gobolka Sanaag ee u dhexeeyey beelaha walaalaha ah ee Naaleeye Axmed iyo habaryonis(SNM). Dagaalkaas oo ahaa mid aad u qadhaadhaa ayaa markii dambe guushu ku raacday Beesha Naaleeye Axmed, kadib markii Habaryoonis lagu soo jabiyey dagaalkii ka dhacay Damalaxagare. Wuxuu yidhi;

  1.  Inkastoo aanan dhawr godol, murtida gaawaha u qaadan

  2.  Gocor iyo nin liitaa, gawdha waligiiye

  3.  wuu gole ka fuulaa ninkii, gabay yaqaanaaye


  1.  Wabigii ganaane ayaan ahay iyo, gacanki xaafuune

  2.  Gufaacada dabayshaan ahay iyo, gooxa dhaxameede

  3.  Aan gardaadsho maansada, anay igu galoolayde


  1. Guluf iyo dagaal maalintay, gaydhu ololaysay

  2.  Gumucyada dayaamiyo, markuu sumucu gawleeyey

  3.  Naaleeye maguuraa colaad, guulaheen baraye


  1.  Waa niman garkaa iyo garkaa, guuyo foofsada'e

  2.  Waa niman sidii gaani bahal, giirta oo kaca'e

  3.  Waa niman goorama leh sidii, gayshashkii yurube


  1.  Waa nima gamaankiyo fardaha, gaar u daaqsada'e

  2.  Godobtooda maqan waa rag aan, galina moogayne

  

  1.  Taariikhda laga soo gudbiyo, gooshka iyo haatan

  2.  Gadhcadaayaddii Ciroobay iyo siduu, sheegay goxoshaagu

  3.  Waligoodba guul lagama helin, guutadaan ahaye

  

  1.  Ma gudboona aadmigu sidii, adhiyo geeliiye

  2.  Dadna waa gob amase waa, sab iyo laan gaabe

  3.  Ilaa maalintii Guulaheen dunida, gawdiidshay


  1.  Iyo gooshkanoo uumiyuhu, gaadhay tiro doora

  2.  Inagaa garaadada ahayn, geedka loo diro e

  3.  Waa garangarteenaa talada, gogol dhigeediiye

  

  1.  Gunta muuse tuurwaa miyaan, guuto lagu saarin

  2.  Cabdi xaamud goolaftan baa, looga dhigay gaare


  1.  Waligoodba waa galabsadaan, guuldariyo hoogge

  2.  Naaleeye Gadoodaa waxbuu, galalaf laayaaye

  3.  Gadhka midhisho gabiyada Cabaydh, qararka geeseeya

  4.  Garabyada Kulmiye goodiga Xamaas,  guro waqooyi oo dhan

  5.  Meeshii galoolkiyo lahayd, gaxadhka dheeraaday

  6.  Caadhimidhe gunteediyo markii, la isku helay goobta


  1.  Sida halaq gadaafiyo dhibiyo, godob ka yaabaaya

  2.  Ma godbay ku dhuunteen fulaan, garasho dheerayne

  3.  Golis iyo miyaan buurihii, gurada loo saarin

  

  1.  Cabdalaha gariirkii ka baxay, maqal Giriigiiye

  2.  Ku garaacnay maadhiinka iyo, gumuci fiicnaaye

  3.  Urursuge gabooyahakanay, gacal wadaagaane

  4.  Gaagaabshay oo caawa waa, wada gurboodkaase

  5.  Muusa Yoonis gabanaa ka hadhay, gabi ahaantoode

  

  1.  Gacankii cadmeed muuse carre, gudub bedweyntiiye

  2.  Gamiinkay qabeen baa ku yidhi, geeddi baa wacane

  3.  Inkastooy yuhuud goobayeen,gaalo lagu eerto


  1.  Waa gaadhiwaayeen lug baan, gaadhi kuu noqone

  2.  Magan-gale Sanciyo dawladii, loo golayn jiraye

  3.  Garaw bay ka quutaan anfaco, labada gooroode

 

  1.  Jaarsada garaabaysatiyo oromo, gaagaaban

  2.  Gudob biirsi iyo ciise iyo, garabo soo hiishay

  3.  Gidigiiba iidoor markuu herar, ka soo gaasay

  

  1.  Iyagoo galbeed iyo ka yimid, sud iyo Gaaroodi

  2.  Iyagoo gargoorkiyo ka badan, geedihiyo maadha

  3.  Boqol gaban rag aan gaadhin, baa gaabshay oo dilaye

  

  1.  Geed adaygi caataa ka helay, libinti goobeede

  2.  Waatay sidii cawl la ganay, guban u yaaceene

  

  1.  Afartaa ga'dii samatar iyo, gabaygi Maaweel dheh

  2.  Isaga gardaadayn yiqiin, tix iyo geeraare

  3.  Siciid qamax godkuu degi jiriyo, godol naqiisii dheh

  

  1.  Golos iyo ismaaciil markay, golaha joogaan dheh

  2.  Afarkalena waa gaardiye aan soo, gadaal celiyo

  3.  Giiramaha jirtada kaydiyo, galiya sooyaalka

  

  1.  Ganbo dumar miyaan loogu xidhay, gagidi ceeldheere

  2.  Baacsiga garmaamada miyaan, guban la waydaarin

  3.  Geediga ma laasimo ninkay, gaajo lagadaaye

  

  1.  Guuraha habeenimo miyaan, fayfle lagu gaadhin

  2.  Waagoo guduud xiga miyaan, gaade lagu saarin

  3.  Fadhigaab miyaan kaymihii, layga wada guurin

  

  1.  Gacal baynu nahay saw raggii, kuma guraabaasin

  2.  Abti  gamaska iga dhawr miyaan, hadal ku soo gaaban

  3.  Gunta uma naxnee saw anana, uma calool giijin

  

  1.  Kaljinaabo guurtida miyaan, lagu gumadaynin

  2.  Garmaqaate awlaxa miyaan, cumar ku googaynin?

  3.  Harafood gadiidkii miyaan, gudiri loo loogin

  4.  Miyaan goonjigiisii dhurwaa, gigin cismaan dheere

  

  1.  Gororkiisa dhiigii miyaan, galal la moodaynin

  2.  Gurmad taama qaariga miyaan, laga go'doonsiinin

  3.  Gasiin iyo anfaaciba miyaan, gawska laga dhaarin

  4.  Goof iyo miyaan ceel afwayn, wiiradu is gaadhin

  

  1.  Na gumaade'eey miyaan, guuxu noqon waayin

  2.  Naga gaadha'eey miyaan, gabadhuhu  uugaamin

  3.  Geesaaska mooyee miyaan, hadalkii soo gaaban

  

  1.  Ugu guntada xabaalaha miyaan, la isku guubaabin

  2.  Miyaan maydku geedaha dul marin, dhiraha gaagaaban

  3.  Gorgorkiyo miyaan haadka qaday, gorodo waynaanin

  

  1.  Hitlarkii adduunyada ganbiyay gaaliyo islaamba

  2.  Ma gaduu yuhuud kula kacaa, bohol la gaadhsiiyay?

  3.  Gaadaafooyinkaygii miyaa, lala gubtaanyooday

  4.  Ma gawaadhi baa laga dalacay, gabano loo aayay


  1.  Mana gaadno reeraha sidii, gocorka iidoore

  2.  Iyagoo guntiga laalayoo, guluf u qaashaartay

  3.  Gildhigaanka faransiis miyaa, lagu unuun gooyay


  1.  Na gargaara Hawiyoow miyaan, geedka lala fuulin

  2.  Xaabooyin subixii la galay, geeri baa timiye

  3.  Guunyada ragii waday miyaan, gacanta loo qaadin

  4.  Waxay geel lahaayeen miyaan, golaha loo diidin


  1.  Sida kayn dab galay baa, maalin loo gubaye

  2.  Ilamaa goldheeraan ku tagay, geenyadaan wadaye

  3.  Gariyaad waxaa looga qaxi, guuto weerara'e

  4.  Banankii gar adag wiilal, baa galiyay duulaane


  1.  Waxba gabaygu yuu ila gudbine, waxan ku soo gaabshay

  2.  Miyaan nala giriifaa rag, baa goodi jabiyaaye!


Diyaarintii iyo Qoristii: Ayaanle Maxamed Ismaaciil ( Ayaanle Darwiish )